Rəqs uşaqlarda əqli çevikliyi gücləndirir
Uşaq rəqsləri və balet uşağın fiziki, zehni və sosial inkişafı üçün bir çox üstünlüklərə malikdir. Rəqsin uşaqların inkişafında bu qədər faydalı olmasının 6 səbəbini diqqətinizə təqdim edirik.
1. İdman və bədəni tanıma
Uşaq rəqsi heyrətamiz bir məşq formasıdır, amma bununla belə, heç məşq kimi də hiss edilmir! İnsan bədənində 600-ə yaxın əzələ var və rəqs bunların böyük hissəsini gəzinti və qaçışdan daha çox hərəkətə gətirir. Rəqs etməyi öyrənərək uşaqlar bədənləri və edə biləcəkləri hərəkətlər haqqında daha çox məlumat əldə edirlər. Uşaqlar hər əzələnin nəyə qadir olacağını daha dərindən dərk edirlər. Bu, uşaqlara hərəkətləri təcrübədən keçirməkdə cəsarətlərini artırmağa və nəyə qadir olduqlarını anlamağa kömək edir.
Rəqs ayrıca fiziki və məkan şüurunu inkişaf etdirir, uşaqlara öz bədən dillərini başa düşməyə və koordinasiya qurmağa kömək edir. Üstəlik, koordinasiya velosiped sürmək və ya top tutmağı öyrənmək kimi bir çox digər fəaliyyətlərə aid edilə bilən vacib bir bacarıqdır.
2. Komanda işi
Uşaq rəqsi və balet komanda işi anlayışını uşaqlara anlatmaq üçün əla bir vasitə hesab olunur. Gənc yaşdan komanda fəaliyyətlərində iştirak uşaqlara qrup şəraitində uğurla işləməyi öyrədir. Daha sonra bu bacarıq məktəbə və iş həyatında davam etdirilir.
Komandanın bir hissəsi olaraq işləmək, həmçinin uşaqlara səbirli olmaq, sosiallaşmaq və dinləmək kimi dəyərli sosial bacarıqları öyrənməyə kömək edir. Uşaqlara bir şeydən əmin olmadıqda komanda yoldaşlarından yardım istəmələrini öyrədir. Qrup fəaliyyətləri, uşaqlar arasında bir birlik hissini inkişaf etdirərək, başqaları ilə təcrübə mübadiləsinin dəyərini aşılayır.
3. Əməkdaşlıq və sosial bacarıqlar
Başqaları ilə ünsiyyət qurmağı və əməkdaşlıq etməyi öyrənmək uşağın idrak qabiliyyətinin inkişafı üçün çox vacibdir. Sinifdə uşaqlar digər dostlarının vaxtına hörmət etməklə növbələrini gözləməyi öyrənirlər. Uşaqlara, hətta bir çox böyüklərdə çatışmayan cəhət hesab olunan başqalarının qarşısında duyğularını ifadə etmə bacarığı öyrədilir! Rəqs və balet mühiti uşaqlara həmyaşıdları və müəllimləri ilə münasibət qurmağı öyrənməyə kömək edəcəkdir.
4. Əqli çeviklik
Əqli çeviklik zəkanın itiliyini və özümüzü tez və asanlıqla ifadə etmək qabiliyyətini əks etdirir. Rəqs öyrənərkən təkrar məşqlər zehni çevikliyin inkişafına kömək edir. Yeni bədən hərəkətləri və jestlərini öyrənmək uşaqlara fikirlərini asanlıqla toplamağa kömək edir. Uşaq rəqsi kinestetik zəkanın inkişafına kömək edə bilər. Yüksək kinestetik zəkaya sahib insanlar ümumiyyətlə əl-göz koordinasiyasına və bədəni tanıma qabiliyyətinə malikdirlər.
5. Etimad və özünəinam
Rəqs dərsləri uşaqlarda özünə hörməti, inamı yaratmağa kömək edə bilər. Bu, uşağın bir rəqs hərəkətini uğurla yerinə yetirdiyi zaman yaşadığı uğurun hesabınadır. Bir hərəkəti və ya hərəkətlər ardıcıllığını mənimsəmək üçün lazım olan təkrarlama da uşaqlara motivasiyanın dəyərini öyrədir. Bu həvəs və motivasiya bir uşağın həyatının digər sahələrinə keçir.
6. Bu, əyləncəlidir
Əylənmək rəqsin çox vacib bir hissəsidir! Rəqs ifadəli hərəkəti təşviq edir, təxəyyül və emosional sərbəstliyi inkişaf etdirir və uşaqlara bütün maneələri aşaraq əylənməyi öyrədir. "Əyləncəli" anlayışının getdikcə daha çox rəqəmsal fəaliyyətlərdə istifadə olunduğu bir dövrdə əyləncə və fiziki hərəkət hisslərini yenidən inkişaf etdirmək üçün rəqs mükəmməl bir vasitədir.
