Onlayn biznes - azad iş qrafiki, minimum kapital!

Müasir insanın həyatını internetsiz təssəvvür etmək artıq qeyri-mümkündür. Tez-tez eşitdiyimiz onlayn ("online") adlanan bir sistem həyatımıza təsir edir, bizə biznes imkanları yaradır. Diqqət etmisinizsə, gündəlik həyatımızda qarşımıza çıxan istənilən məhsulun və ya həmin məhsulu istehsal edən şirkətin internetdə saytını və sosial şəbəkə səhifəsini tapmadıqda artıq həmin məhsul və ya istehsalçısı barədə bizdə informasiya baxımından neqativ fikir yaranır. Bu faktoru eyni zamanda xidmət sektoruna da aid etmək olar. Xidmət sektorunda fəaliyyət göstərən banklar, otellər, tədris kursları, restoranlar, informasiya agentlikləri və turizm şirkətlərini saytsız, sosial şəbəkədə səhifəsiz təsəvvür etmək çətindir. Razılaşaq ki, bu, artıq bizim üçün bir istehlakçı olaraq tələbə çevrilib.
Hazırda Azərbaycanda şəxsi biznesini qurmaq istəyən gənc sahibkarların böyük əksəriyyəti işini internet üzərindən qurmağa daha çox üstünlük verir. Səbəb aydındır: ilk növbədə internetdə biznes qurmaq üçün ilkin kapital daha az tələb olunur. Həmçinin gənclər interneti daha yaxşı bildiklərindən burada biznesin daha asan qurulmasını və daha böyük alıcı kütləsini əhatə edəcəyini düşünürlər. İnternet üzərindən virtual satışı çox zaman e-biznes və ya onlayn biznes adlandırırıq. Təbiidir ki, onlayn biznesin ənənəvi alış-verişdən bir çox üstünlüklərinin olması pul qazanmaq istəyən insanların bu sahəyə marağının daha da artmasına səbəb olur. Qısa desək, artıq onlayn ticarət erasıdır və bu sektorda yer almaq vaxtı çoxdan çatıb.
Onlayn biznesin bildiyimiz ənənəvi biznesdən əsas fərqlərinə diqqət yetirək. Razılaşaq ki, müqayisə etmədən hər hansı birinin üstünlüyünü anlamaq mümkün deyil.
Hazırda istənilən ənənəvi bizneslə məşğul olmaq üçün aşağıdakı faktorların olması vacib şərtdir:
1. ƏLAQƏLƏR - mövcud şəraitdə istənilən biznesin yaradılması zamanı əlaqələrin olması əsas faktorlardan birinə çevrilib. Bu faktorun olması müvafiq qeydiyyat, icazə və ya lisenziyaların tez alınmasında xüsusi rol oynayır;
2. KAPİTAL - bu faktor biznes sektorundan asılı olaraq dəyişir, lakin istənilən halda minimum kapital ilə yaxanızı qurtara bilməyəcəksiniz;
3. VAXT - biznesin təşkili və idarəsi mövcud mühitdə sahibkarın bütün vaxtını alır. Sahibkarlar çox zaman günün 24 saatını işə sərf etməti və ya ilin bütün fəsillərində istirahətsiz işləməyə məcbur olurlar;
4. KOMANDA - hər bir gəlir gətirən biznesi təkbaşına idarə etmək kifayət qədər çətindir və bir çox hallarda hətta mümkün deyil. Bu səbəbdən etibarlı və professional kadrların olması biznesin fasiləsiz fəaliyyətinin təminatçısıdır.
Bəs onlayn biznesə başlamaq və gəlir əldə etmək üçün tələb olunan nədir? Bunun üçün cəmi iki faktorun olması yetərlidir:
1. İnternet bizneslə məşğul olmaq istəyi və araşdırma aparmaq bacarığı
2. Kompüter və internetə çıxış
Biznesdə uğur qazanmaq üçün hamıdan ağıllı olmağa ehtiyac yoxdur, uğur sadəcə bunu hamıdan daha tez edənindir. Nəticədə müşahidə etdiyimiz faktorları müqayisə etdikdə onlayn bizneslə məşğul olan sahibkarların sayının durmadan artmasının əsas səbəblərini aydın şəkildə görürük. Bununla yanaşı, onlayn biznesin əsas üstünlüklərinə bir daha nəzər yetirək:
1) Azad iş qrafiki - bundan gözəl nə ola bilər?! İş vaxtınızı özünüz müəyyən edir və tənzimləyirsiniz. Əminəm ki, hər birimiz öz iş vaxtımızın özümüzdən asılı olmasını arzulayırıq. Lakin bu tip iş qrafikinin əsas prinsipi - nə qədər işləsəniz, bir o qədər də qazanacaqsınız. Birbaşa gəlir ona sərf etdiyiniz vaxtın qədərindən asılıdır.
2) Müstəqillik - heç kimdən asılı deyilsiniz! İşinizin sahibi özünüzsünüz! Uğur, reputasiya və gəlir yalnız sizdən asılıdır. Biznesdə müstəqillik həmçinin böyük məsuliyyət deməkdir.
3) Minimum kapital qoyuluşu və xərclər - onlayn biznesdə qazanmaq üçün şirkət təsis etməyə, ofis icarəsinə, avadanlıq alınmasına və əlavə işçilərə (məs: mühafizəçi və ya xadimə) ehtiyac yoxdur. Bu faktor əsasən xidmət sektorunda - onlayn hüquqi, biznes və ya tibbi konsultasiya, reklamçılıq, İT xidmətləri, daşınmaz əmlakın alqı-satqısı və s. kimi fəaliyyət növləri ilə məşğul olan sahibkarlar üçün xüsusilə vacibdir.
4) Məkan məhdudiyyətinin olmaması - biznesinizin yerləşdiyini ölkə və ya şəhərdən asılı olmayaraq asanlıqla idarə edə bilərsiniz. Onlayn rejimin yaratdığı bu imkan həmçinin eyni vaxtda bir neçə biznesin effektli idarəsini təmin etməkdə böyük rol oynayır.
5) Əlavə gəlir mənbəyi - ixtisasınızdan və ya faktiki işlədiyiniz sektordan (dövlət və ya özəl) asılı olmayaraq e-bizneslə əlavə gəlir mənbəyi kimi də məşğul ola bilərsiniz. Bu zaman əsas işinizdən ayrılmadan və sadəcə işdən sonrakı vaxtınızı öz biznesinizə sərf etməklə əlavə gəlirinizi təmin edə bilərsiniz.
6) Yaş məhdudiyyətinin olmaması - onlayın biznesdə yaş məhdudiyəti heç vaxt olmayıb. Digər bizneslərdən fərqli olaraq, burada istənilən yaş qrupunda - məktəbli, tələbə, təqaüdçü və ya hər hansı fiziki qüsuru olan şəxs məşğul ola bilər. Yetər ki, internetlə işləmək bacarığı olsun.
7) Seçim imkanı - dünyada onlayn biznesin sektorlar üzrə müxtəlif növləri, xüsusiyyətləri, inkişaf dinamikası ilə bağlı internetdə informasiya və statistik məlumatlar mövcuddur. Seçim imkanı kifayət qədərdir. Yeni ideya fikirləşmək üçün vaxt sərf etməyə ehtiyac yoxdur. Hazır informasiya bazasını analiz edərək istənilən seqment üzrə istiqamətlənmiş biznesinizi qura bilərsiniz. Yetər ki, axtarın!
8) Təcrübə qazanmaq imkanı - internet açıq kitab kimidir: oxu, öyrən və tətbiq elə! Burada e-biznesi qurmağın yolları və necə idarə edilməsi ilə bağlı informasiya kifayət qədər var. Bir çox hallarda e-biznes ilə məşğul olan sahibkarlar bu sahədə öz təcrübələri ilə açıq şəkildə və təmənnasız bölüşürlər. Virtual aləmdə uğur qazanmış biznesmenlərin təcrübələrindən istifadə edərək öz işinizdə tətbiq edə bilərsiniz.